“డీడీలు కట్టి కూడా రవాణా లేకపోతే మా పరిస్థితి ఏమిటి?” – టిప్పర్ యజమానుల ఆవేదన…

1. డీడీలు కట్టి నష్టాల్లో టిప్పర్ యజమానులు
2. టీజీఎండీసీ విధానాలపై ఆందోళన – ఇసుక కొరతతో ప్రజలకు కష్టాలు…
3. అధికారిక రవాణా నిలిచినా… అక్రమ ఇసుక దందా యథావిధి….
4. చెక్‌పోస్టుల్లో పర్యవేక్షణ లోపం – రాత్రివేళల్లో అక్రమ రవాణా ఆరోపణలు
5. జిల్లా కలెక్టర్ జోక్యం కోరుతున్న వాహనదారులు
6. “మన ఇసుక – మన వాహనం” అమలుపై సందేహాలు…

నిజామాబాద్ జిల్లాలో ఇసుక సమస్య రోజురోజుకు తీవ్రరూపం దాల్చుతోంది. అంతర్రాష్ట్ర చెక్‌పోస్టుల వద్ద టీజీఎండీసీ అమలు చేస్తున్న విధానాల కారణంగా టిప్పర్ వాహనాలు గత నెల రోజులుగా నిలిచిపోయి, యజమానులు తీవ్రమైన ఆర్థిక ఇబ్బందులను ఎదుర్కొంటున్నారు.
లక్షల రూపాయలు పెట్టుబడి పెట్టి టిప్పర్ వాహనాలు కొనుగోలు చేసిన యజమానులు, ఇసుక రవాణా నిలిచిపోవడంతో ఆదాయం లేక నష్టాల్లో కూరుకుపోయామని ఆవేదన వ్యక్తం చేస్తున్నారు. ఇప్పటికే డీడీల రూపంలో వేల రూపాయలు చెల్లించినప్పటికీ, రవాణా జరగకపోవడంతో ఆ మొత్తాల పరిస్థితి ఏమైందన్న సందేహాలు వ్యక్తమవుతున్నాయి.
ఇక మరోవైపు, జిల్లాలో ఇసుక కొరత తీవ్రంగా మారడంతో ఇళ్ల నిర్మాణ పనులు నిలిచిపోయాయి. సాధారణ ప్రజలు ఇసుక కోసం ఇబ్బందులు పడుతుండగా, అధికారికంగా రవాణా నిలిచిపోయిన పరిస్థితిలో అక్రమ ఇసుక రవాణా మాత్రం కొనసాగుతుండటంపై స్థానికులు ఆగ్రహం వ్యక్తం చేస్తున్నారు.
ప్రభుత్వం ప్రకటించిన “మన ఇసుక – మన వాహనం” విధానం అమలు పై కూడా సందేహాలు వ్యక్తమవుతున్నాయి. నిబంధనలకు లోబడి వ్యాపారం చేస్తున్నామని చెబుతున్న వాహనదారులు, ప్రతి దశలోనూ ఇబ్బందులు ఎదుర్కొంటున్నామని తెలిపారు.
అదనంగా, రాత్రి వేళల్లో చెక్‌పోస్టుల్లో పర్యవేక్షణ లోపం ఉన్నట్లు ఆరోపణలు వినిపిస్తున్నాయి. కొన్నిచోట్ల సిబ్బంది లేకపోవడం వల్ల అక్రమ ఇసుక రవాణా వాహనాలు నిర్బంధం లేకుండా సంచరిస్తున్నాయనే విమర్శలు ఉన్నాయి. దీనిపై సంబంధిత అధికారుల నిర్లక్ష్యం ఉందన్న అభిప్రాయాలు వ్యక్తమవుతున్నాయి.
ఈ నేపథ్యంలో జిల్లా కలెక్టర్ తక్షణ జోక్యం చేసుకుని సమస్యను పరిష్కరించాలని, నిలిచిపోయిన టిప్పర్ వాహనాలను తిరిగి రోడ్లపైకి అనుమతించాలని వాహనదారులు విజ్ఞప్తి చేస్తున్నారు. లేకపోతే తమ జీవనోపాధి పూర్తిగా దెబ్బతింటుందని వారు ఆందోళన వ్యక్తం చేస్తున్నారు.

Author: V1News Telangana.& Hindi & Mharti.

V1 News & Daily Newspaper is Hiring Reporters V1 News & Daily Newspaper invites applications from enthusiastic and dedicated individuals to join our team as Reporters. Interested candidates can contact: PENDKAR SRINIVAS 📞 9603925163 📞 9834485832