కమ్యూనిటీ కాంటాక్ట్ ప్రోగ్రామ్తో ప్రజలకు అవగాహన కల్పించిన నిజామాబాద్ పోలీసులు..
రోడ్డు భద్రత, మాదకద్రవ్యాల నిర్మూలన, సైబర్ నేరాల నియంత్రణ, మహిళల భద్రతపై అవగాహన
నిజామాబాద్, నవంబర్ 18 (వి1 న్యూస్): ప్రజల భద్రతకు ప్రాధాన్యతనిస్తూ, నేరాల నివారణలో ప్రజలను భాగస్వాములను చేయడమే లక్ష్యంగా నిజామాబాద్ పోలీసులు కమ్యూనిటీ కాంటాక్ట్ ప్రోగ్రామ్ నిర్వహించారు. పోలీస్ కమిషనర్ శ్రీ పి. సాయి చైతన్య, ఐపీఎస్ ఆదేశాల మేరకు బుధవారం సాయంత్రం సుమారు 6 గంటలకు నిజామాబాద్ రెండో టౌన్ పోలీస్ స్టేషన్ పరిధిలోని గాజులపేట ప్రాంతంలో ఏసీపీ శ్రీ ప్రకాష్ ఆధ్వర్యంలో ఈ కార్యక్రమం జరిగింది.
ఈ సందర్భంగా పోలీసు అధికారులు స్థానిక ప్రజలతో నేరుగా సమావేశమై రోడ్డు భద్రత, మాదకద్రవ్యాల నిర్మూలన, సైబర్ నేరాల నియంత్రణ, దొంగతనాల నివారణ, మహిళల భద్రత తదితర అంశాలపై అవగాహన కల్పించారు.
రోడ్డు భద్రతపై సూచనలు:
ప్రతి ఒక్కరూ ట్రాఫిక్ నిబంధనలు తప్పనిసరిగా పాటించాలని, ద్విచక్ర వాహనదారులు హెల్మెట్ ధరించాలని, వాహనాలు నడిపేటప్పుడు అప్రమత్తంగా ఉండాలని సూచించారు.
మాదకద్రవ్యాలకు యువత దూరంగా ఉండాలి:
డ్రగ్స్ వినియోగం, అక్రమ రవాణా వల్ల కలిగే దుష్పరిణామాలను వివరించారు. యువత మాదకద్రవ్యాల బారిన పడకుండా జాగ్రత్తలు తీసుకోవాలని, డ్రగ్స్ రహిత సమాజ నిర్మాణానికి ప్రతి ఒక్కరూ సహకరించాలని కోరారు.
సైబర్ నేరాల పట్ల అప్రమత్తత అవసరం: గుర్తుతెలియని ఫోన్ కాల్స్, అనుమానాస్పద లింకులు, నకిలీ సందేశాలు, ఆన్లైన్ మోసాల పట్ల అప్రమత్తంగా ఉండాలని సూచించారు. బ్యాంకు ఖాతా వివరాలు, ఓటీపీ వంటి రహస్య సమాచారాన్ని ఇతరులకు వెల్లడించవద్దని హెచ్చరించారు.
దొంగతనాల నివారణకు జాగ్రత్తలు:
ఇళ్లకు తాళాలు వేసి బయటకు వెళ్లే సమయంలో తగిన జాగ్రత్తలు తీసుకోవాలని, కాలనీల్లో అనుమానాస్పద వ్యక్తులు లేదా కార్యకలాపాలు కనిపిస్తే వెంటనే డయల్ 112కు సమాచారం అందించాలని సూచించారు.

మహిళల భద్రతకు ప్రాధాన్యత:
మహిళలు, బాలికల రక్షణ కోసం పోలీస్ శాఖ చేపడుతున్న చర్యలను వివరించారు. ఎలాంటి వేధింపులు ఎదురైనా భయపడకుండా పోలీసులను సంప్రదించాలని సూచించారు.
అనంతరం కమ్యూనిటీ కాంటాక్ట్ కార్యక్రమంలో భాగంగా గాజులపేట ప్రాంతంలో సుమారు 45 ద్విచక్ర వాహనాలను పోలీసులు తనిఖీ చేశారు.
ఈ సందర్భంగా పోలీసు అధికారులు మాట్లాడుతూ.. ప్రజలకు, పోలీసులకు మధ్య సత్సంబంధాలను బలోపేతం చేయడం, స్థానిక సమస్యలను తెలుసుకోవడం, నేరాల నివారణలో ప్రజలను భాగస్వాములను చేయడమే కమ్యూనిటీ కాంటాక్ట్ ప్రోగ్రామ్ ప్రధాన ఉద్దేశమని తెలిపారు. ప్రజల సహకారంతోనే నేరరహిత, సురక్షిత సమాజ నిర్మాణం సాధ్యమవుతుందని పేర్కొన్నారు. ప్రజల రక్షణ కోసం నిజామాబాద్ పోలీస్ శాఖ ఎల్లప్పుడూ అందుబాటులో ఉంటుందని స్పష్టం చేశారు.
ఈ కార్యక్రమంలో టౌన్ సీఐ శ్రీ సత్యనారాయణ, రెండో టౌన్ ఎస్హెచ్ఓ శ్రీ యాదగిరి గౌడ్, మూడో టౌన్ ఎస్హెచ్ఓ శ్రీ హరిబాబు, ఐదో టౌన్ ఎస్ఐ శ్రీ లక్ష్మయ్య, ఆరో టౌన్ ఎస్ఐ శ్రీ సందీప్, ఇతర పోలీసు అధికారులు పాల్గొన్నారు. స్థానిక ప్రాంతానికి చెందిన సుమారు 150 మంది ప్రజలు హాజరై పోలీసుల సూచనలు, సలహాలను స్వీకరించారు.
Author: వాస్తవాలపై ముందడుగు
V1newstelangana.... కలం అమ్ముడుపోకూడదు.. వార్త వంగిపోకూడదు!” “నిజాన్ని నిర్భయంగా చెప్పడమే నిజమైన జర్నలిజం!” “ప్రజా సమస్యలే మా ప్రాధాన్యం.. ప్రజల హక్కులే మా బాధ్యత!”









