కోటగిరిలో రైతులతో కలిసి బాజిరెడ్డి గోవర్ధన్ మహాధర్నా
- హల్దీ వాగు ద్వారా వెంటనే నీటి విడుదల చేయాలని డిమాండ్
- ప్రభుత్వ నిర్లక్ష్యంతో వేల ఎకరాల పంటలు ఎండుముఖం
- అధికారులకు వినతిపత్రం అందజేసిన రైతులు, బీఆర్ఎస్ నాయకులు
కోటగిరి, జూలై 15 (వి1 న్యూస్):
వర్షాభావ పరిస్థితులతో నిజాంసాగర్ ఆయకట్టు పరిధిలో సాగు చేసిన వేలాది ఎకరాల పంటలు ఎండుముఖం పడుతున్నా ప్రభుత్వం స్పందించడం లేదని బీఆర్ఎస్ సీనియర్ నాయకుడు, మాజీ ఎమ్మెల్యే బాజిరెడ్డి గోవర్ధన్ తీవ్ర ఆగ్రహం వ్యక్తం చేశారు. రైతుల పంటలను కాపాడాలంటే హల్దీ వాగు ద్వారా వెంటనే నిజాంసాగర్ ప్రాజెక్టుకు నీటిని విడుదల చేసి సాగునీరు అందించాలని ప్రభుత్వాన్ని డిమాండ్ చేశారు.
ఈ మేరకు బుధవారం కోటగిరి మండల కేంద్రంలోని తహసీల్దార్ కార్యాలయం ఎదుట రైతులతో కలిసి మహాధర్నా నిర్వహించారు. అనంతరం అధికారులకు వినతిపత్రం సమర్పించారు. వర్షాలు లేకపోవడంతో వరి, సోయాబీన్, మొక్కజొన్న, పెసర, మినుము తదితర పంటలు తీవ్ర నీటి ఎద్దడితో ఎండిపోతున్నాయని రైతులు ఆవేదన వ్యక్తం చేశారు.
ఈ సందర్భంగా బాజిరెడ్డి గోవర్ధన్ మాట్లాడుతూ, గతంలో అప్పటి శాసనసభాపతి, ప్రస్తుత బాన్సువాడ ఎమ్మెల్యే పోచారం శ్రీనివాస్ రెడ్డి కాలేశ్వరం ప్రాజెక్టు నుంచి హల్దీ వాగు ద్వారా రోజుకు ఒక టీఎంసీ నీటిని నిజాంసాగర్కు తరలించవచ్చని ప్రకటించిన విషయాన్ని గుర్తు చేశారు. ఆ హామీని ఇప్పుడు అమలు చేసి రైతులను ఆదుకోవాలని కోరారు.
లక్షల కోట్ల రూపాయల వ్యయంతో నిర్మించిన కాలేశ్వరం ప్రాజెక్టు రైతులకు అవసరమైన సమయంలో ఉపయోగపడకపోవడం బాధాకరమని ఆయన అన్నారు. వర్షాభావంతో చెరువులు, కుంటలు ఎండిపోవడంతో పాటు భూగర్భ జలాలు కూడా అడుగంటిపోవడంతో రైతులు తీవ్ర ఇబ్బందులు ఎదుర్కొంటున్నారని తెలిపారు. లక్షల రూపాయలు పెట్టుబడి పెట్టిన పంటలు కళ్లముందే ఎండిపోతుండడం రైతాంగానికి తీరని నష్టాన్ని మిగులుస్తోందని ఆవేదన వ్యక్తం చేశారు.
ఇటీవల జాకోర ఎత్తిపోతల పథకం ప్రారంభోత్సవానికి వచ్చిన రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి నిజాంసాగర్కు నీటిని విడుదల చేస్తామని హామీ ఇచ్చినప్పటికీ, ఇప్పటి వరకు ఆ హామీ అమలుకాలేదని విమర్శించారు. ప్రభుత్వం ఇకనైనా స్పందించి వెంటనే నీటిని విడుదల చేసి ఆయకట్టు రైతులను ఆదుకోవాలని కోరారు.
అభివృద్ధి కోసం కాంగ్రెస్ పార్టీలో చేరినట్లు చెప్పుకుంటున్న స్థానిక ఎమ్మెల్యే పోచారం శ్రీనివాస్ రెడ్డి ఎండిపోతున్న పంటలపై దృష్టి సారించి రైతుల సమస్యల పరిష్కారానికి చొరవ చూపాలని సూచించారు. రైతు సంక్షేమమే ప్రభుత్వ ప్రధాన లక్ష్యంగా ఉండాలని, ఆలస్యం చేయకుండా నిజాంసాగర్కు నీటిని విడుదల చేయాలని ప్రభుత్వాన్ని డిమాండ్ చేశారు.
కాగా, ఇదే సమస్యపై రెండు రోజుల క్రితం బీజేపీ నాయకులు కూడా తహసీల్దార్కు వినతిపత్రం అందజేశారు. నిజాంసాగర్ ఆయకట్టు రైతుల సమస్యపై అన్ని రాజకీయ పార్టీలు ప్రభుత్వంపై ఒత్తిడి పెంచుతున్నాయి.
మహాధర్నాలో బీఆర్ఎస్ నాయకులు జుబేర్, అంజిరెడ్డి, శ్రీనివాసరావు, ఎలమంచిలి శ్రీనివాసరావు, నార్ల రత్నకుమార్తో పాటు పలువురు పార్టీ నాయకులు, కార్యకర్తలు, రైతులు పెద్ద సంఖ్యలో పాల్గొన్నారు.
హైలైట్:
“ఎండిపోతున్న ప్రతి ఎకరా వెనుక ఓ రైతు కుటుంబం కన్నీరు ఉంది… ప్రభుత్వం వెంటనే నిజాంసాగర్కు నీటిని విడుదల చేసి రైతాంగాన్ని ఆదుకోవాలి.” — మాజీ ఎమ్మెల్యే బాజిరెడ్డి గోవర్ధన్
“రైతు చెమటే దేశానికి అన్నం… ఆ చెమట వృథా కాకుండా చూడటం ప్రభుత్వ ధర్మం.”
Author: पेंडकर श्रीनिवास
V1 News & Daily Newspaper is Hiring Reporters V1 News & Daily Newspaper invites applications from enthusiastic and dedicated individuals to join our team as Reporters. Interested candidates can contact: PENDKAR SRINIVAS 📞 9603925163 📞 9834485832
