బోధన్ ప్రభుత్వ ఆసుపత్రి సిబ్బందిపై ఆరోపణలు.. సమగ్ర విచారణకు ఆర్డీవోకు వినతి
బోధన్, సెప్టెంబర్ 21:
బోధన్ జిల్లా ప్రభుత్వ ఆసుపత్రిలో పోస్ట్మార్టం నిర్వహించేందుకు కొంతమంది సిబ్బంది మృతుల కుటుంబ సభ్యుల నుంచి డబ్బులు డిమాండ్ చేస్తున్నారంటూ నిజామాబాద్ పార్లమెంట్ తెలుగు యువత బోధన్ నియోజకవర్గం ఇన్చార్జి ఎత్తుండ రాజేందర్ ఆర్డీవోకు ఫిర్యాదు చేశారు.
ఇప్పటికే ఈ అంశంపై పత్రికల్లో వార్తలు వచ్చినప్పటికీ, ఇలాంటి ఘటనలు పునరావృతమవుతున్నాయని ఫిర్యాదులో పేర్కొన్నారు. కుటుంబ సభ్యుడిని కోల్పోయి తీవ్ర విషాదంలో ఉన్న వారి వద్ద పోస్ట్మార్టం కోసం డబ్బులు అడగడం బాధాకరమని ఆయన పేర్కొన్నారు.
తన ఫిర్యాదుకు ఆధారంగా ఫోన్పే ద్వారా డబ్బులు చెల్లించినట్లు చూపించే స్క్రీన్షాట్ జిరాక్స్ కాపీని జత చేసినట్లు తెలిపారు. ఈ ఆరోపణలపై సమగ్ర విచారణ చేపట్టి, ఆరోపణలు నిజమని తేలితే బాధ్యులపై నిబంధనల ప్రకారం చర్యలు తీసుకోవాలని కోరారు.
అలాగే, భవిష్యత్తులో ఇలాంటి ఫిర్యాదులకు అవకాశం లేకుండా ఆసుపత్రి ప్రాంగణంలో “పోస్ట్మార్టం కోసం డబ్బులు చెల్లించాల్సిన అవసరం లేదు. ఎవరైనా డబ్బులు డిమాండ్ చేస్తే ఉన్నతాధికారులకు ఫిర్యాదు చేయండి” అనే సమాచారాన్ని అధికారుల ఫోన్ నంబర్లతో కూడిన ఫ్లెక్సీలు, వాల్ రైటింగ్ లేదా నోటీసుల రూపంలో ఏర్పాటు చేయాలని కోరారు.
అయితే, సిబ్బందిపై వచ్చిన ఈ ఆరోపణల వాస్తవికతపై అధికారిక విచారణ పూర్తయిన తర్వాతే స్పష్టత వచ్చే అవకాశం ఉంది. అధికారులు విచారణ జరిపి వాస్తవాలను వెల్లడించాల్సి ఉంది.
Author: पेंडकर श्रीनिवास
V1 News & Daily Newspaper is Hiring Reporters V1 News & Daily Newspaper invites applications from enthusiastic and dedicated individuals to join our team as Reporters. Interested candidates can contact: PENDKAR SRINIVAS 📞 9603925163 📞 9834485832
