రబీ సాగుకు నిజాంసాగర్ నీటిని వెంటనే విడుదల చేయాలి!

👇समाचार सुनने के लिए यहां क्लिक करें

..రైతుల ప్రయోజనాలే ప్రభుత్వానికి ప్రాధాన్యం కావాలి.. 9 గంటల ఉచిత విద్యుత్ సరఫరా చేయాలి…

బాన్సువాడ రైతులకు సాగునీరు అందిస్తే రూ.1,000 కోట్ల ఆదాయం వచ్చే అవకాశం – ఎలమంచిలి శ్రీనివాస్….

నిజామాబాద్: రబీ పంటల సాగు సమయం సమీపిస్తున్న నేపథ్యంలో బాన్సువాడ నియోజకవర్గ రైతులకు నిజాంసాగర్ ప్రాజెక్టు నుంచి వెంటనే సాగునీటిని విడుదల చేయాలని, వ్యవసాయానికి రోజుకు 9 గంటల పాటు విద్యుత్ సరఫరా చేయాలని ఎంపీటీసీల సంఘం రాష్ట్ర మాజీ అధ్యక్షుడు, బీఆర్ఎస్ నాయకుడు ఎలమంచిలి శ్రీనివాస్ ప్రభుత్వాన్ని డిమాండ్ చేశారు.

రుద్రూర్ మండల కేంద్రంలో బీఆర్ఎస్ పార్టీ ఆధ్వర్యంలో రైతులతో నిర్వహించిన విలేకరుల సమావేశంలో ఆయన మాట్లాడారు. బాన్సువాడ నియోజకవర్గం ప్రధానంగా వ్యవసాయంపై ఆధారపడిన ప్రాంతమని, ఇక్కడి రైతులకు వరి సాగు మినహా ఇతర పంటల సాగుకు భూములు అంతగా అనుకూలంగా లేవని పేర్కొన్నారు. ప్రస్తుతం నిజాంసాగర్ ప్రాజెక్టులో సుమారు 9 టీఎంసీల నీరు అందుబాటులో ఉందని, గతంలో 6 టీఎంసీల నీరు ఉన్న సమయంలోనూ సాగునీటిని విడుదల చేసిన సందర్భాలు ఉన్నాయని గుర్తుచేశారు. అలాంటప్పుడు ప్రస్తుతం నీటి నిల్వలు ఉన్నప్పటికీ రబీ సాగుకు నీటిని విడుదల చేయకపోవడం రైతులకు ఇబ్బందికరంగా మారుతుందని అన్నారు.

రైతులకు సాగునీరు అందితేనే ఆర్థిక ప్రగతి

బాన్సువాడ నియోజకవర్గంలో రైతులు పూర్తిస్థాయిలో పంటలు సాగు చేసి మంచి దిగుబడులు సాధిస్తే ఈ ప్రాంతానికి సుమారు రూ.1,000 కోట్ల ఆదాయం వచ్చే అవకాశం ఉందని ఎలమంచిలి శ్రీనివాస్ అభిప్రాయపడ్డారు. రైతులు పండించిన పంటలకు గిట్టుబాటు ధర లభించడంతో పాటు సాగునీరు, నాణ్యమైన విద్యుత్ సరఫరా అందితే గ్రామీణ ఆర్థిక వ్యవస్థ బలోపేతమవుతుందని తెలిపారు. రైతుల కష్టాన్ని గుర్తించి ప్రభుత్వం తక్షణమే స్పందించాలని కోరారు.

గత అభివృద్ధి పనులను గుర్తు చేసిన బీఆర్ఎస్ నాయకులు..

గత బీఆర్ఎస్ ప్రభుత్వ హయాంలో బాన్సువాడ నియోజకవర్గ అభివృద్ధికి ప్రత్యేక ప్రాధాన్యత ఇచ్చిన విషయాన్ని ఈ సందర్భంగా గుర్తు చేసుకోవాల్సి ఉంది. అప్పటి ముఖ్యమంత్రి కేసీఆర్ 2023 మార్చిలో నియోజకవర్గ అభివృద్ధి పనుల కోసం ముఖ్యమంత్రి ప్రత్యేక నిధి నుంచి రూ.50 కోట్లు మంజూరు చేశారు. అలాగే జాకోరా, చందూర్ ఎత్తిపోతల పథకాల కోసం రూ.106 కోట్ల నిధుల కేటాయింపుతో ఎగువ ప్రాంత రైతులకు సాగునీరు అందించే దిశగా చర్యలు చేపట్టారు. ఈ పథకాల ద్వారా సుమారు 10 వేల ఎకరాలకు సాగునీరు అందించాలనే లక్ష్యాన్ని అప్పట్లో ప్రకటించారు. గ్రామీణ ప్రాంతాల్లో మౌలిక సదుపాయాల కల్పనకు కూడా ప్రాధాన్యత ఇచ్చారు. ఈ అభివృద్ధి కార్యక్రమాలు బాన్సువాడ ప్రాంతంలో వ్యవసాయ, గ్రామీణ అభివృద్ధిపై అప్పటి ప్రభుత్వం చూపిన శ్రద్ధకు నిదర్శనంగా నిలిచాయి.

ధాన్యం కొనుగోళ్లలోనూ రైతులకు న్యాయం చేయాలి..

వర్ని ప్రాంతంలో ఇంకా కొనుగోలు కాకుండా మిగిలిపోయిన వరి ధాన్యాన్ని ప్రభుత్వం వెంటనే కొనుగోలు చేయాలని ఎలమంచిలి శ్రీనివాస్ డిమాండ్ చేశారు. క్వింటాలుకు రూ.3,700 చొప్పున చెల్లించి రైతుల వద్ద ఉన్న ధాన్యాన్ని కొనుగోలు చేయాలని కోరారు. రైతులు నెలల తరబడి కష్టపడి పండించిన పంటను అమ్ముకోవడానికి ఇబ్బందులు పడే పరిస్థితి రాకూడదన్నారు.

ప్రభుత్వం వెంటనే స్పందించి నిజాంసాగర్ నీటిని విడుదల చేయడంతో పాటు విద్యుత్ సరఫరా, ధాన్యం కొనుగోళ్ల సమస్యలను పరిష్కరించాలని కోరారు. రైతుల సమస్యలపై నిర్లక్ష్యం వహిస్తే బీఆర్ఎస్ పార్టీ ఆధ్వర్యంలో రైతులతో కలిసి పెద్ద ఎత్తున ఉద్యమం చేపడతామని ప్రభుత్వాన్ని హెచ్చరించారు.

ఈ సమావేశంలో రుద్రూర్ బీఆర్ఎస్ నాయకుడు రవికిరణ్, కోటగిరి మండల బీఆర్ఎస్ నాయకుడు తెల్ల రవి, పోతంగల్ నాయకుడు సూదం నవీన్, వర్ని మండల నాయకుడు గంగప్ప, దౌడు సాయిలు, ఆమందు గోపి, బంజరు సుమన్ తదితరులు పాల్గొన్నారు……