పోలీస్ అమరవీరుల వారోత్సవాల్లో భాగంగా నిజామాబాద్‌లో సైకిల్‌, బైక్‌ ర్యాలీ నిర్వహించారు. అదనపు పోలీస్ కమిషనర్‌ ఎన్‌. శుభం ప్రకాష్‌ ర్యాలీని ప్రారంభించారు….
పోలీస్ అమరవీరుల స్ఫూర్తితో సైకిల్‌, బైక్‌ ర్యాలీ
పూలాంగ్‌ చౌరస్తా నుంచి పోలీస్ హెడ్‌క్వార్టర్స్‌ వరకు ర్యాలీ
అమరవీరుల త్యాగాలను స్మరించుకున్న అదనపు పోలీస్ కమిషనర్‌ ఎన్‌. శుభం ప్రకాష్‌
నిజామాబాద్‌, అక్టోబర్‌ 25: పోలీస్ అమరవీరుల సంస్మరణ వారోత్సవాల్లో భాగంగా తెలంగాణ పోలీస్ శాఖ ఆధ్వర్యంలో నిజామాబాద్‌లో ఆదివారం సైకిల్‌, బైక్‌ ర్యాలీ నిర్వహించారు. నిజామాబాద్‌ పోలీస్ కమిషనర్‌ పి. సాయి చైతన్య, ఐపీఎస్‌ ఆదేశాల మేరకు అదనపు పోలీస్ కమిషనర్‌ (అడ్మిన్‌) ఎన్‌. శుభం ప్రకాష్‌ ఆధ్వర్యంలో ఈ కార్యక్రమం జరిగింది.
ఉదయం 8 గంటలకు పూలాంగ్‌ చౌరస్తా వద్ద అదనపు పోలీస్ కమిషనర్‌ ఎన్‌. శుభం ప్రకాష్‌ జెండా ఊపి ర్యాలీని ప్రారంభించారు. పూలాంగ్‌ చౌరస్తా నుంచి ప్రగతి ఆసుపత్రి, ఎల్‌ఐసీ చౌరస్తా, కోర్టు చౌరస్తా, ఎన్టీఆర్‌ చౌరస్తా మీదుగా పోలీస్ హెడ్‌క్వార్టర్స్‌ వరకు ర్యాలీ కొనసాగింది.
ఈ సందర్భంగా అదనపు పోలీస్ కమిషనర్‌ మాట్లాడుతూ.. దేశ అంతర్గత భద్రతను కాపాడటంతోపాటు నక్సలైట్లు, మతపరమైన విభజన శక్తులు, ఇతర సవాళ్లను ధైర్యంగా ఎదుర్కొంటూ అనేక మంది పోలీసు సిబ్బంది తమ ప్రాణాలను త్యాగం చేశారని గుర్తుచేశారు. నేరాల నియంత్రణ, మాదకద్రవ్యాల నిర్మూలన, మహిళల భద్రత వంటి కీలక బాధ్యతలను నిర్వర్తిస్తూ అమరులైన పోలీసుల త్యాగాలు చిరస్మరణీయమని పేర్కొన్నారు. వారి సేవలు, త్యాగాల వల్లే సమాజంలో శాంతిభద్రతలు పరిరక్షించబడుతున్నాయని అన్నారు.
నిజామాబాద్‌ పోలీస్ కమిషనరేట్‌ పరిధిలో ప్రజల రక్షణ కోసం ప్రాణాలర్పించిన అమరవీరుల త్యాగాలు ఎప్పటికీ మరువలేనివని తెలిపారు. జిల్లాలో అసాంఘిక కార్యకలాపాలకు తావులేకుండా ప్రజలు పోలీసులకు సహకరించాలని కోరారు. ఎక్కడైనా అనుమానాస్పద ఘటనలు లేదా అసాంఘిక కార్యకలాపాలు గుర్తించినట్లయితే వెంటనే పోలీసులకు సమాచారం అందించాలని సూచించారు.
పోలీస్ అమరవీరుల సంస్మరణ వారోత్సవాల్లో భాగంగా అమరుల కుటుంబాలను పరామర్శించినట్లు తెలిపారు. పోలీసులంతా ఒకే కుటుంబమని, వారు ధరించే యూనిఫాం ప్రతి ఒక్కరికీ గర్వకారణమని పేర్కొన్నారు. అమరవీరుల త్యాగాలను స్ఫూర్తిగా తీసుకొని దేశం కోసం, న్యాయం కోసం, పక్షపాతం లేకుండా ప్రజలకు సేవ చేయాలని పిలుపునిచ్చారు.
ఈ కార్యక్రమంలో సీఐలు, రిజర్వ్‌ ఇన్‌స్పెక్టర్లు, ఎస్‌ఐలు, ఆర్‌ఎస్‌ఐలు, ఆర్మ్డ్‌ రిజర్వ్‌ సిబ్బంది, స్పెషల్‌ పార్టీ సిబ్బంది, విద్యార్థులు తదితరులు పాల్గొన్నారు.
— పోలీస్ పీఆర్‌ఓ, నిజామాబాద్‌ పోలీస్ కార్యాలయం
Author: వాస్తవాలపై ముందడుగు
V1newstelangana.... కలం అమ్ముడుపోకూడదు.. వార్త వంగిపోకూడదు!” “నిజాన్ని నిర్భయంగా చెప్పడమే నిజమైన జర్నలిజం!” “ప్రజా సమస్యలే మా ప్రాధాన్యం.. ప్రజల హక్కులే మా బాధ్యత!”
