సేవాభావానికి ప్రతిరూపంగా లయన్స్ క్లబ్.. పత్రికా రంగానికి విశేష సేవలందించిన బలరామరాజుకు ఆత్మీయ సత్కారం…

బోధన్: సమాజ శ్రేయస్సే లక్ష్యంగా, ప్రజా సమస్యలే అజెండాగా, అక్షరాన్నే ఆయుధంగా మలుచుకుని నాలుగు దశాబ్దాలుగా పత్రికా రంగానికి విశేష సేవలందిస్తున్న సీనియర్ జర్నలిస్ట్ సాగిరాజు బలరామరాజుకు లయన్స్ క్లబ్ ఆఫ్ ఆచన్ పల్లి ఘనంగా సన్మానం చేసి తన గౌరవాన్ని చాటుకుంది.
జాతీయ పత్రికా దినోత్సవాన్ని పురస్కరించుకుని మంగళవారం బోధన్ పట్టణంలో లయన్స్ క్లబ్ ఆఫ్ ఆచన్ పల్లి ఆధ్వర్యంలో నిర్వహించిన కార్యక్రమంలో బలరామరాజును శాలువాతో సత్కరించి ఘనంగా అభినందించారు.
సుదీర్ఘంగా నాలుగు దశాబ్దాల పాటు పత్రికా రంగంలో కొనసాగుతూ తన అనుభవంతో, అంకితభావంతో జర్నలిజానికి సేవలందిస్తున్న బలరామరాజును గౌరవించడం పట్ల క్లబ్ ప్రతినిధులు సంతోషం వ్యక్తం చేశారు. లయన్స్ క్లబ్ సభ్యుడిగా కూడా కొనసాగుతున్న ఆయన సేవలను గుర్తించి సత్కరించడం తమకు ఎంతో ఆనందంగా ఉందని పేర్కొన్నారు.
సమాజంలో జరిగే పరిణామాలను ప్రజలకు తెలియజేయడం, ప్రజా సమస్యలను అధికారుల దృష్టికి తీసుకెళ్లడం, ప్రజలకు-ప్రభుత్వానికి మధ్య వారధిగా నిలవడం జర్నలిస్టుల బాధ్యత అని ఈ సందర్భంగా ప్రతినిధులు గుర్తుచేశారు. నాలుగు దశాబ్దాలుగా పత్రికా రంగంలో అనుభవాన్ని సంపాదించి సేవలందిస్తున్న బలరామరాజు వంటి సీనియర్ జర్నలిస్టులను గౌరవించడం ద్వారా పత్రికా రంగం పట్ల గౌరవాన్ని చాటుకోవడంతో పాటు, భావితరాలకు సేవాభావం, వృత్తి నిబద్ధతను గుర్తుచేసినట్లవుతుందని పేర్కొన్నారు.
ఈ సందర్భంగా లయన్స్ క్లబ్ ఆఫ్ ఆచన్ పల్లి అధ్యక్షులు దుర్గారావు మాట్లాడుతూ.. జర్నలిజంలో నైతిక విలువలను కాపాడటం, మీడియా పాటించాల్సిన నియమ నిబంధనల అమలుకు ప్రెస్ కౌన్సిల్ ఆఫ్ ఇండియా కీలక పాత్ర పోషిస్తోందన్నారు. 1966 నవంబర్ 16న ప్రెస్ కౌన్సిల్ ఆఫ్ ఇండియా చట్టబద్ధంగా ఏర్పడిందని, అప్పటి నుంచి ప్రతి సంవత్సరం నవంబర్ 16న జాతీయ పత్రికా దినోత్సవాన్ని నిర్వహిస్తున్నామని వివరించారు.
సేవాభావంతో సమాజానికి అండగా నిలుస్తూ, వివిధ రంగాల్లో విశేష సేవలందిస్తున్న వారిని గుర్తించి గౌరవించడం లయన్స్ క్లబ్ లక్ష్యమని ఈ సందర్భంగా క్లబ్ ప్రతినిధులు చాటిచెప్పారు.
ఈ కార్యక్రమంలో శ్రీ విజయసాయి హైస్కూల్ ప్రిన్సిపాల్ ఎస్. కృష్ణమోహన్, లయన్స్ క్లబ్ ఆఫ్ ఆచన్ పల్లి ప్రతినిధులు ఐ.ఆర్. చక్రవర్తి, శ్రీనివాసరాజు, కరుటూరి రామకృష్ణ, పి. గాంధీ, కామేపల్లి సత్యం, హరిబాబు, కృష్ణమూర్తి, లక్ష్మీకాంత్ రెడ్డి తదితరులు పాల్గొన్నారు.
Author: వాస్తవాలపై ముందడుగు
V1newstelangana.... కలం అమ్ముడుపోకూడదు.. వార్త వంగిపోకూడదు!” “నిజాన్ని నిర్భయంగా చెప్పడమే నిజమైన జర్నలిజం!” “ప్రజా సమస్యలే మా ప్రాధాన్యం.. ప్రజల హక్కులే మా బాధ్యత!”







