బోధన్‌లో మండల అంతర్ పాఠశాల క్రీడోత్సవాలు ఘనంగా ప్రారంభం.. జ్యోతి ప్రజ్వలన చేసి జెండా ఆవిష్కరించిన ప్రజాప్రతినిధులు…

బోధన్, నవంబర్ 12:

విద్యార్థులు చదువుతో పాటు క్రీడల్లోనూ ప్రతిభ కనబరిచి జీవితంలో ఉన్నత శిఖరాలను అధిరోహించాలని ప్రభుత్వ సలహాదారు, బోధన్ ఎమ్మెల్యే పి. సుదర్శన్ రెడ్డి పిలుపునిచ్చారు. క్రీడలు విద్యార్థుల్లో క్రమశిక్షణ, ఆత్మవిశ్వాసం, నాయకత్వ లక్షణాలు, ఐకమత్య భావనను పెంపొందిస్తాయని పేర్కొన్నారు.

నిజామాబాద్ జిల్లా బోధన్ పట్టణంలోని విజయమేరీ ఉన్నత పాఠశాల ఆవరణలో మండల విద్యాధికారి నాగయ్య ఆధ్వర్యంలో నిర్వహించిన బోధన్ మండల అంతర్ పాఠశాల క్రీడోత్సవాలు ఘనంగా ప్రారంభమయ్యాయి. ఈ కార్యక్రమానికి ముఖ్య అతిథులుగా అదనపు కలెక్టర్ భుజంగరావు, ఆర్డీఓ ఎం. విజయకుమారి హాజరుకాగా, ప్రభుత్వ సలహాదారు, బోధన్ ఎమ్మెల్యే పి. సుదర్శన్ రెడ్డి ముఖ్య అతిథిగా పాల్గొన్నారు. ఈ సందర్భంగా జ్యోతి ప్రజ్వలన చేసి, క్రీడా పతాకాన్ని ఆవిష్కరించి క్రీడోత్సవాలను లాంఛనంగా ప్రారంభించారు.

అనంతరం విద్యార్థులను ఉద్దేశించి ఎమ్మెల్యే మాట్లాడుతూ.. విద్య అనేది భవిష్యత్తుకు పునాది అయితే, క్రీడలు శారీరక దృఢత్వంతో పాటు మానసిక వికాసానికి దోహదపడతాయని అన్నారు. క్రీడల్లో గెలుపోటములను సమానంగా స్వీకరిస్తూ పట్టుదల, కృషి, క్రమశిక్షణతో ముందుకు సాగాలని సూచించారు. పాఠశాల స్థాయి నుంచే క్రీడలపై ఆసక్తి పెంపొందించుకుంటే భవిష్యత్తులో రాష్ట్ర, జాతీయ స్థాయిలో రాణించే అవకాశాలు ఉంటాయని పేర్కొన్నారు.

ముఖ్యమంత్రి రేవంత్ రెడ్డి నాయకత్వంలోని రాష్ట్ర ప్రభుత్వం ప్రభుత్వ పాఠశాలల్లో విద్యార్థులకు నాణ్యమైన విద్యతో పాటు మెరుగైన సౌకర్యాలు కల్పించేందుకు చర్యలు చేపడుతోందని తెలిపారు. విద్యార్థులకు నాణ్యమైన యూనిఫాంలు, బూట్లు, పాఠ్యపుస్తకాలతో పాటు నోటు పుస్తకాలు అందిస్తున్నామని, పౌష్టికాహారం కల్పిస్తున్నామని వివరించారు. విద్యార్థుల అవసరాలకు అనుగుణంగా పాఠశాలల్లో మరుగుదొడ్ల సౌకర్యాలను కూడా మెరుగుపరిచినట్లు తెలిపారు.

ప్రతి విద్యార్థి చదువులోనే కాకుండా క్రీడలు, సాంస్కృతిక రంగాల్లోనూ తనకంటూ ప్రత్యేక గుర్తింపు తెచ్చుకోవాలని ఆకాంక్షించారు. విద్యార్థుల్లో దాగి ఉన్న ప్రతిభను వెలికితీసేందుకు ఇలాంటి అంతర్ పాఠశాల క్రీడోత్సవాలు ఎంతో ఉపయోగపడతాయని పేర్కొన్నారు.

ఈ కార్యక్రమంలో బోధన్ మున్సిపల్ చైర్‌పర్సన్ తూము పద్మ శరత్ రెడ్డి, రాష్ట్ర ఉర్దూ అకాడమీ చైర్మన్ తాహెర్, కాంగ్రెస్ పార్టీ జిల్లా అధ్యక్షులు నగేష్ రెడ్డి, పీసీసీ డెలిగేట్ గంగాశంకర్, పీఆర్టీయూ జిల్లా అధ్యక్షులు శంకర్, ట్రస్మా అధ్యక్షులు హరికృష్ణ, విద్యాశాఖ అధికారులు, ఉపాధ్యాయులు, వివిధ పాఠశాలల విద్యార్థులు తదితరులు పాల్గొన్నారు.

క్రీడా మైదానంలో విద్యార్థుల ఉత్సాహం.. ప్రతిభకు పదును పెట్టే వేదికగా అంతర్ పాఠశాల క్రీడోత్సవాలు నిలిచాయి.

Author: వాస్తవాలపై ముందడుగు

V1newstelangana.... కలం అమ్ముడుపోకూడదు.. వార్త వంగిపోకూడదు!” “నిజాన్ని నిర్భయంగా చెప్పడమే నిజమైన జర్నలిజం!” “ప్రజా సమస్యలే మా ప్రాధాన్యం.. ప్రజల హక్కులే మా బాధ్యత!”