ప్రజాప్రతినిధి, విజిలెన్స్ కానిస్టేబుల్ సహా ఏడుగురు పట్టుబాటు | రూ.1.50 లక్షల నగదు, సెల్ఫోన్లు స్వాధీనం | అధికారుల తీరుపై తీవ్ర విమర్శలు
నిజామాబాద్ క్రైమ్, ఆగస్టు 22:
చట్టాలను అమలు చేయాల్సిన బాధ్యతాయుత స్థానాల్లో ఉన్నవారే నిబంధనలను ఉల్లంఘిస్తూ పేకాట ఆడుతూ పట్టుబడిన ఘటన నిజామాబాద్లో తీవ్ర చర్చకు దారితీసింది. ముబారక్నగర్ ఆర్టీసీ కాలనీలోని ఓ ఇంట్లో నిర్వహిస్తున్నట్లు సమాచారం అందిన పేకాట స్థావరంపై ‘చీతా ఫోర్స్’ పోలీసులు శుక్రవారం అర్ధరాత్రి దాడి చేసి ఏడుగురిని అదుపులోకి తీసుకున్నారు.
పోలీసుల కథనం ప్రకారం.. శుక్రవారం రాత్రి సుమారు 11 గంటల సమయంలో పక్కా సమాచారంతో ముబారక్నగర్ ఆర్టీసీ కాలనీలోని ఓ ఇంటిపై పోలీసులు మెరుపు దాడి చేశారు. తనిఖీల్లో ఏడుగురు వ్యక్తులు పేకాట ఆడుతూ పట్టుబడ్డారు. వారిలో ఇంటి యజమాని అయిన అటవీ శాఖ అధికారి, ట్రాన్స్కో విజిలెన్స్ విభాగంలో విధులు నిర్వహిస్తున్న కానిస్టేబుల్, మాజీ ఎంపీపీతో పాటు మరో నలుగురు ఉన్నట్లు సమాచారం.
రూ.1.50 లక్షల నగదు స్వాధీనం
పేకాట ఆడుతున్న ఏడుగురిని పోలీసులు అదుపులోకి తీసుకుని వారి వద్ద నుంచి సుమారు రూ.1.50 లక్షల నగదు, పలు సెల్ఫోన్లు స్వాధీనం చేసుకున్నట్లు తెలిసింది. అనంతరం జూద చట్టంలోని 3, 4 సెక్షన్ల కింద కేసు నమోదు చేసినట్లు సమాచారం.
అధికారులే నిబంధనలు ఉల్లంఘిస్తే..?
సమాజానికి ఆదర్శంగా నిలవాల్సిన ప్రభుత్వ ఉద్యోగులు, ప్రజాప్రతినిధులు ఇలాంటి వ్యవహారంలో పట్టుబడటం విమర్శలకు తావిస్తోంది. ముఖ్యంగా పోలీసు, విజిలెన్స్ వంటి విభాగాల్లో పనిచేసే సిబ్బంది నిబంధనలకు విరుద్ధంగా వ్యవహరించినట్లు ఆరోపణలు రావడం మరింత చర్చనీయాంశంగా మారింది.
చట్టాన్ని కాపాడాల్సిన వారే చట్ట ఉల్లంఘనలకు పాల్పడితే.. ప్రజల్లోకి ఎలాంటి సందేశం వెళ్తుంది?
అనే ప్రశ్నలు వినిపిస్తున్నాయి. ఈ ఘటనను ఉన్నతాధికారులు తీవ్రంగా పరిగణించి, ప్రభుత్వ ఉద్యోగుల పాత్రపై శాఖాపరమైన విచారణ చేపట్టాల్సిన అవసరం ఉందనే అభిప్రాయాలు వ్యక్తమవుతున్నాయి.
పేకాట వెనుక అసలు కథేంటి?
పేకాట నిర్వహణ వెనుక మరెవరైనా ఉన్నారా? ఈ ఇంట్లో గతంలోనూ ఇలాంటి కార్యకలాపాలు జరిగాయా? నగదు లావాదేవీలు ఎలా జరిగాయి? అనే కోణాల్లో దర్యాప్తు జరగాల్సిన అవసరం ఉందనే చర్చ సాగుతోంది. పట్టుబడిన వ్యక్తుల పాత్ర, పేకాట నిర్వహణకు సంబంధించిన పూర్తి వివరాలను పోలీసులు పరిశీలిస్తున్నట్లు సమాచారం.
అధికారుల ఇళ్లే పేకాట స్థావరాలుగా మారుతున్నాయన్న ఆరోపణలకు ఈ ఘటన బలం చేకూర్చిందా?
లేక ఇది ఒక్కసారిగా జరిగిన ఘటన మాత్రమేనా? అన్నది పోలీసుల దర్యాప్తులో తేలాల్సి ఉంది.
చట్టాన్ని అమలు చేయాల్సిన బాధ్యత ఉన్నవారే నిబంధనల ఉల్లంఘనకు పాల్పడినట్లు తేలితే, సంబంధిత శాఖల ఉన్నతాధికారులు కఠినంగా వ్యవహరించాల్సిన అవసరం ఉందని ప్రజలు కోరుతున్నారు.
Author: पेंडकर श्रीनिवास
V1 News & Daily Newspaper is Hiring Reporters V1 News & Daily Newspaper invites applications from enthusiastic and dedicated individuals to join our team as Reporters. Interested candidates can contact: PENDKAR SRINIVAS 📞 9603925163 📞 9834485832
